top of page

Ài復興母語,應該重視台灣本土意識ê覺醒kah建立





Ài復興母語,應該重視台灣本土意識ê覺醒kah建立


作者:#陳育萱


(Tsit篇是作者tī《#台文通訊》30週年慶祝會ONLINE活動ê發言稿。)

逐家好,我是樂暢親子共學空間ê負責人陳育萱(Corrine),代表阮工作室向逐家請安。「樂暢親子共學空間」是一个出租空間,kah《台文通訊》30週年慶祝會ONLINE活動ê其他與會者比--起-來,阮工作室實在無算啥。感謝過去30年來,每一位骨力拍拚tshui-sak台語kah台文ê人。 我熟sāi《台文通訊》是開始學台文了後ê代誌,伊已經是生做tsiok suí ê《台文通訊BONG報》,內容包括文學、生活,有各種無仝角度ê文章。若準看無台文,自然就無法度欣賞伊ê suí。 阮老爸家族是台北人,老母家族是淡水人,五歲進前是阮阿祖用全台語kā我顧--ê。雖bóng tī學校khah無人講台語,tsit个語言一直lóng tī我ê生活中。真正感受著台語tih-beh無--去ê危機感,是tshuā囡仔去長老教會ê主日學運動會。Uì細漢--ê到大漢--ê,超過100个囡仔,台語祈禱全聽無,到尾--à賰主禱文kah謝飯歌tsit兩个用背--ê是台語--ê,其他--ê就lóng無--ah。看一下tshuah一tiô,m̄-koh kánn-ná mā無意外。Kah囡仔做伙讀台文畫本ê時tsūn,發覺家己根本看lóng無,就準講ē-hiáu淡薄仔台語,leh讀ê時mā是lóng用臆--ê。 透過其他家長ê介紹,邀請李江却台語文教基金會執行長陳豐惠老師,共同舉辦「樂講台語~爸媽加油讚」台文讀寫班。Tsit个課程ê特色就是爸母kā囡仔tshuā tī身軀邊,鬥陣來上課mā m̄免感覺有負擔,逐家lóng ē-tàng互相體諒。Tsua̋nn開始ài上半年、全台灣lóng真罕得看ê親子友善讀寫班。真濟人lóng講beh學台語iah是台文m̄免khai錢學,家己學就好,我感覺是在人--ê。我tī學校真hân-bān讀冊,gâu讀冊--ê凊彩看看--leh就ē-hiáu--ah,我ài khai雙倍ê時間,mā無一定學ē起--來。Ta̋nn開始學ê時tsūn,心內壓力tsiok大--ê。 阿惠老師是一个tsiânn特別ê人,推動台文復興已經30年。照講做仝款ê代誌30年,厭siān、應付mā有可能,m̄-koh你ē-tàng感受伊對研究台語kah台灣文化tsiok有興趣。保持好奇ê態度、真願意研究新ê mi̍h件,佗位有需要,伊就去佗位;若準家己無親身出馬,mā ē盡量tàu揣資源,做tsia-ê代誌應該bē-tàng趁大錢,koh tsiah-nī辛苦,伊ê精神影響伊所有ê學生。 頭起先,阿惠老師先介紹網路資源、按怎查字典,課本提--來,uì上尾--à開始教?哪ē án-ne--lah!所有學台文ē hông問--著ê問題,上課lóng總提出來討論。Ta̋nn開始ê時tsūn實在有夠痛苦--ê,suà--落-去就是一直練、一直練、一直練。雖然是無簡單,lán想看māi,lán khai偌濟時間學華文、學英文,koh khai偌濟時間學台文?完全無接觸--過ê mi̍h件,免講,是萬事起頭難。 Ná做khang-khuè、ná tshuā囡仔、ná學台文,半年了後,雖然聲調m̄是kài熟,拍字速度有夠慢--ê!竟然ē-tàng用手機仔拍字系統寫一寡囡仔故事--ah neh!畫本khah看有--ah!有án-ne ê改變,實在真歡喜! 學台文m̄-nā教我讀寫ê工夫niā-niā,koh hōo我意外產生看台灣ê新眼光,koh-khah關心tsit个lán鬥陣徛起ê島嶼。上課ê時tsūn,lán講著tsiok濟tī學校課本m̄ bat聽講ê歷史,你了解tsia-ê台灣真正發生--過ê代誌,你無可能一點仔感覺lóng無——原來lán已經慣勢ê民主自由ê空氣,是經過hiah-nī濟人ê拍拚,是hiah-nī仔值得珍惜。 阮翁是半个客人,m̄-nā bē-hiáu講客話,mā聽無半句,讀寫koh-khah bē-hiáu,若問伊講對客話kah客家文化有啥mih感覺?無感覺;若是客話、客家文化消失--去,有啥mih 感覺?Mā無感覺!哪ē無感覺?無認同就無感情,無感情就無感覺,若án-ne kan-ta賰血緣是客人niā-niā,別人講啥mi̍h lóng無khah-tsua̍h,kah伊無關係。 以家長kah經營者ê角度來看,我認為tshui-sak本土語言有三个重點:

  1. M̄-thang hông感覺學習本土語言kah學習華語、英語iah是其他語言有衝突,ē-sái做伙學,in有無仝款ê意義,mā mài kah任何政黨牽做伙。

  2. 應該強調學習本土語言ê好處kah重要性,思考按怎建立本土文化ê認同,刺激台灣意識ê覺醒。學習本土語言m̄是老師ê代誌,是每一个台灣人ê代誌。

  3. Uì家庭出發,保持興趣,沓沓仔建立規家伙仔多語言轉換ê能力。上kài重要--ê是,一步一跤印,hōo囡仔對本土語言產生情感ê連結,ài真正開始講--出-來,m̄-thang hōo本土語言活tī課本內底。


論真來講,語言ê流行kah衰亡,無論是人為因素iah是為著啥mih原因,若無人講,就自然ē消失--去--ah。無論台語未來ê發展如何,lán逐家做家己ē-tàng做--ê,就有夠--ah!未來樂暢koh有各種無仝形式ê推廣活動,比如台北腔ê台羅教學影片,請鬥陣支持。阮台北偏泉腔講ê人khah少,hōo其他ê腔影響mā是真自然,m̄-koh阮就是想beh保留阮ê地方特色,一直堅持傳承!歡迎逐家有機會來樂暢tshit-thô,iah是來阮面冊tshi̍h讚,分享阮ê影片!


---------------


#台文通訊30歲 專欄,本文使用教育部推薦漢字kap臺灣閩南語羅馬字拼音方案。

台文通訊BONG報330期,2021年9月出刊


歡迎捐款贊助 #李江却台語文教基金會 

(捐款可抵稅,匯款後請通知02-23112199)

郵政劃撥:19021486

戶名:財團法人李江却台語文教基金會

電匯:123-20-050514-2 華南銀行士林分行活儲

戶名:財團法人李江却台語文教基金會


#李江却台語文教基金會 需要你ê定期捐款,逐年贊助本會(台文通訊BONG報發行單位)NT$2,400,lán做伙復振台灣語文ê事工kap雜誌編印發行費用,捐款thang抵稅。

コメント


bottom of page